Luk 21 | WSK | STEP | Jesus temple ningi baga se loaga guruguwaram, se kariimet nungumik mel ago wore Kaem munan tumonko manga ago taikasan, ale ko kuwim te betera ko mu te awukasan se nungarkam.

Luke 21

Imet gerewa nu Kaem munan tuam

(Mark 12:41-44)

1 Jesus temple ningi baga se loaga guruguwaram, se kariimet nungumik mel ago wore Kaem munan tumonko manga ago taikasan, ale ko kuwim te betera ko mu te awukasan se nungarkam. 2 Ale loaga gurugu se bagaram, mu imet gerewa bo kumik mel mena, wore manga diriyam bilik ilagala mu giam, ale Kaem munan tuokko ago tai ko kuwim te awuram.

3 Se Jesus balam, “Ani den nunguning ninga manorsam, imet gerewa kumik mel mena imi ko manga biling ilagala Kaem tuam mu kariimet suen biya Kaem munan tuman mu nunga kiaram. 4 Nononga manga suen biya se saki la beteman. Bare imet sumu kumik mel mena wore noko manga katirta gotek tom udagi te numi te sangukko mu ago tai beteram.” ^{▼▼Luke 21:3-4 Kaem munan tua: 2 Cor 8:12.}

Jesus maingte temple parasuwumonko mu ko den balam

(Mat 24:1-2; Mark 13:1-2)

5 Olekem alo nuna temple ko balukasan ale iwita balman, “Kawam imi nuna manga ningo nuam wore te ninguru kaloman,” maman, “ale mel suen biya kariimet Kaem munan tuikasan wore te yawarakala kumik nungurman.” Bare Jesus nunga maonam, 6 “Mel suen biya nina aitak arigisan imi mu, temple parasuwumonko tom tai aratuk mu manga bo ta nunumi awete me bagomonkowo, mu suen la pakaku warmon se kapa sapurukko.”

Ikup duap duap aratukko

(Mat 24:3-14; Mark 13:3-13)

7 Se nuna Jesus isarman, “Kari biya,” maman, “tom amaru temple imi maguwumonko ya? Se anape mel girok aratuk se ana aringinak ale te ikinak ‘Tom pingi aram bo,’ manakko.”

8 Se Jesus nunga maonam, “Nina kari saki ninga kulurmon bore ko ninguru sinar talko! Mu awuk, kawel kari kasik biyala taimon ale aninga aip te nunumi balmon, ‘Ani agata Kristus!’ mamon, aking ‘Tom tai aratam bo!’ mamonko. Bare nina nogowom me kaoralko. 9 Nina sor saki te kager barasomon se ko den ikial, se sor saki te nunga supuling nunga karomon ale iru betemonko ko den ikial, mu me ko biririkiral ale me ko nguangaralko. Mel mu girimon aratomonkowo. Bare tom nukum mu tom mu te me tai aratukko.”

10 Jesus ko olekem nunga maonam, “Wonong sor bo barasuk bo ilak kagerurukko. Se king bo barasuk bo ilak butata tala numi iluwokko. 11 Sor saki te wanara bibiya kapurukkowo. Wonong saki te na menaruk se karak biya nunga morukkowo. Kariimet nuna kuera ikes bibiya tamonkowo. Taiti bowa ko mel koma kirker nunguningkiri aratuk se arigal ale ko nguangaralkowo.

12 “Bare mel mu suen biyala me aratuk se nuna girimon ninga ilumon ale ninga bita maguwumonko. Nuna synagogue ningi nengerak namomon se isa ningarmon, ale talipara ningi ninga warmonko. Nuna aninga aip maguwumonko ko ikia tamon, ale ninga gimon nama king se supuling nomokete ninga bangarmonko. 13 Se tom umutang te mu nenenga tom yawara aninga dugu duap te balalko. 14 Bare nina nononga den koma aguwaya balalko mu ko giral ikia me ninga morukko. 15 Mu awuk, tom mu te ani agata ikia ningarikko, ale den te balalko mu ninga kausekko. Se nina den bur sokel ago balal, se nenenga kager kari mu nuna den mu biriruwumon ale eremon se kapurukko me terong.

16 “Nenenga ninam nenet, ninga launuria gue suwan, ninga bagara suwan, nuna karogo ninga kager kari nuguting te ninga betemonko. Se nina sika alo ninga momon se kueralko. 17 Mu awuk, aninga aip nenengate aniso, se umutang ko kariimet nenenga ko nongomang ninguru magurukkowo. 18 Bare nina ninga nisipiling te nemene gawa bo me ta yumurokko. 19 Nina sokel ago bagaral mu asele nina marak yawara tom suen biya te bagaralko mu talko. ^{▼▼Luke 21:19 Sail ago baganakko den: Heb 10:35-36.}

Ikup aromemek Jerusalem wonong irokko

(Mat 24:15-21; Mark 13:14-19)

20 “Tom nina kager motam bibiya Jerusalem taluru gurugumon se arigal, mu te nina ikialko, wonong maguwumonko tom pingi aram bo malko. 21 Tom mu te nina saki Judea sor te bagaral agi mu, nagural ale duruk kulupik ningi nama saparalko. Se nina saki Jerusalem ningi bagaral agi mu, kuwim biya mu beteral ale naguralko. Se nina wonong Jerusalem buring ko bagaral agi mu, peleral Jerusalem ningi me kasu naguralko. 22 Mu awuk, tom umutang mu Kaem memek koma kutuwurokko tom, den suen la Kaem ko batoga te aniso borta nunguning kaposo. 23 Tom umu te imet nutagu ago, se imet kuriang amin tui se anira mu ura kowar betemonkowo! Ikup yaman biyala ali imitang te kapuruk ale kariimet nunga irokkowo! Mu kariimet imitang Kaem ko gomang magara mu aringimonkowo! 24 Saki mu nuna bainat te nunga momon se kuemonko. Se saki nunga talipomon ale nongorak sor saki te nama nunga awumonko. Se ali sor saki ko kariimet mu Jerusalem wonong eremon ale karogo bagomon, nama tom te balam mu te menarukko. ^{▼▼Luke 21:24 Ali sor saki ko kariimet Jerusalem eremon karogo bagomonko: Rom 11:25; Rev 11:2.}

Kari ko Kuriang peleruk tairukko

(Mat 24:29-31; Mark 13:24-27)

25 “Tom mu te worem sige baras te mel kilimik ta aratukko. Se ali imi te gagi nirung biyala kelaguk ale biyala namuruk tairukko. Se kariimet nguangomon ale aguwaya betemonko bare mena. ^{▼▼Luke 21:25-27 Ana me nguanganakko: Psa 46:1-3. Jesus peleruk tairukko: Dan 7:13; Mat 26:64; Rev 1:7.} 26 Mel aora aora taiti kuali anisan mu se baras sige worem yukumonko, se kariimet nguangara biyala nunga irok se ali imi te aguwaya nunga bitirukko mu ko nguanga se kimi bitawomonko. 27 Se tom umutang te nuna Kari ko Kuriang taiti nuwi ningi nikim biya se sokel ago tai kapawuruk se aringimonko. 28 Bare kam mel mu duap bitirukko, mu nina am barasu dirmal, nisipiling patowaral, ale loaga se balalko, ‘Tom Kaem ana te nanga giokko mu tai aratam bo,’ ma balalko.”

Tam fig ko kausa

(Mat 24:32-35; Mark 13:28-31)

29 Asele Jesus den tuaturum bo nunga maonam, “Nina tam fig se tam saki ago nunga ikia talko! 30 Tam mu gawa iru aratuwoso se arigisan, mu nina mu te ko ikisan mu na inang ko nunguning gia ko tom pingi aram masan. 31 Koma suwanta tala, nina mel ani ko ninga manem mu aratomon se arigal, mu nina te ikial Kaem ko kingdom tai pingi aram ma balalko.

32 “Ani nunguningta ninga manorsam, tom imi ko kariimet mu me kuemon la, mel imi suen la aratu sapurukko. 33 Taiti ali karogo menarukko, bare aninga den mu me ta menarukkowo.

Ana sinar ago baganakko

34 “Nina nengeta ninga bagara aolak ko sinar talko. Nina yu nana ngualara ale inang yu biya betera ko ikia me ninga morukko. Ale ali ewere ko ikup ko ikia tawun biya me talko. Munan suwuta mu ninga ira murok se ngualawaral ale, Kari Biya ko tom te tairukko wore me ko ikial, se dagarok te sorara iwita, tairatela nengete tairuk bore ko. 35 Mu awuk, tom umutang ali lilim ko kariimet nongote aratukko. 36 Buta se nina tom suen biya sinar ago bagaralko. Ale Kaem aru ngatanguru se bagaral mu asele nu sokel ningaruk se, tom umutang aratuk mu nina kiaral, ale komasang te kaparal, nama Kari ko Kuriang moke dugu te sanamaralko.” ^{▼▼Luke 21:34-36 Ana sinar ago baganakko: Rom 13:10-14; 1 Thes 5:1-4; Mark 13:33; Rev 6:17.}

37 Jesus woremkalal tom suen biya kariimet temple ningi den nunga kasurukaso. Se turom batagakaso mu nu nama Duruk Olive te anikaso. 38 Se kariimet suen biya tumong biyala barasukasan ale nu kote temple ningi den ikimonko namakasan.